Te ngaro haere o ngā tikanga tūturu e pā ana ki te hao matamata
Te rerekē haere o ngā tikanga hao matamata
Ko tētahi taputapu tūturu hei hao matamata, he kupenga koko ka kīia e ētahi o te hunga mahi matamata i Waikato he kaka. I ngā rā i mua, ka whakamaua he raumata ki te tarawhiti, he mea waihanga te tarawhiti ki te akaaka (Ripogonum scandens). Ka herea atu he kakau roa ki te tarawhiti, he mea hanga pea te kakau nei ki te kahikatea (Dacrycarpus dacrydiodes). Ko ētahi atu rākau i whakamahia hei hanga i te kaka, ko te mānuka (Leptospermum scoparium) me te mauku (Cordyline australis). Hei whakamahi i te kaka, ka tū te kaihao ki roto rawa o te awa (kia tae pea te wai ki tōna uma tonu) ki tētahi momo pae rānei (he pae i te rākau, ki te toka, ki te tāhuna rānei) – mā reira rawa e mau ai he matamata.
Nō reira me matatau tonu, me whai pūkenga tonu te ringahao:
me mārama ia kei hea ake o te awa ngā ika e rere ana i mea rangi, i mea rangi (arā, me mōhio ki ngā āhuatanga o te taiao e taki ana i te rere o te matamata)
me tika te wā me te āhua o te tuku i te kaka ki te wai, me te āta koko ake i te wai.
He wāhine e hao matamata ana i te awa o Waikato
Ko te kaka te ingoa o te momo kupenga koko whakamahia ai e ētahi tāngata mahi matamata o Waikato.
Nō roto mai i Te Reo o Te Repo – the Voice of the Wetland via Te Ara - The Encyclopedia of New Zealand
Ko tētahi atu taputapu i whakamahia, ka kīia he papa ariari. Ko te hiako whakaroto o te mauku, he mā te tae, tētahi mea i whakamahia mō tēnei. Ka whakatakotoria ki te takere o te wai i mua tata atu o te wāhi e tū ana te kaihao, kia ariari ai te kitea atu o ngā rāngai ika e whakatata mai ana ki te kaka.
He kaihao i Mōkau me tana kupenga he mea tuku kia takoto ki te takere o te awa
Ko ētahi tikanga hao matamata o ēnei rā, ko te tuku kupenga ki te takere o te awa, takoto ai, me te whakatū pā hei ‘arataki’ i te matamata ki te waha o te kupenga.
Ko tētahi taputapu whakamahia ai i ēnei rā, he kupenga ka whakatakotoria ki te takere o te awa . Ka taea hoki te whakatū pā ki te taha (e whakaaetia ana kia 6 mita te roa) hei ‘arataki’ haere i te matamata ki te waha o te kupenga. Nā te rahi o ēnei kupenga (ka 4.5 m rawa pea te paenga whakaroto o te waha), te whakamahi pā , me te raumata maitai, he nui tonu te matamata e taea ana te hao ake i te wai i te haonga kotahi (he neke atu pea i te 80 kg).
Ko te rohe o Waikato, ko Te Pūaha o Waikato te aronga nui o tēnei mātaitanga. He kupu pea kua whakamahia i konei e tauhou ana ki a koe, ki ō tupuna hoki. E tika ana kia pēnei – kei ngā tūpuna o tēnā rohe , o tēnā iwi , o tēnā hapū ā rātou ake kupu. Ko te huhua o ngā ingoa e taunaki ana i te whānui me te hōhonu o te mōhio o ngā tūpuna ki ngā ika, ki ngā rākau me ngā otaota, ki ngā manu, ki ngā pepeke, otirā ki ngā tini hononga me ngā pāhekoheko i roto i ngā momo, i waenga i ngā momo, i waenga hoki i ngā momo me ō rātou taiao . He wā anō i whakaata ngā ingoa i ngā mahi me ngā whakamahinga o ngā tini a Tāne, a Maru, a Tangaroa. Engari kua ngaro te maha noa atu o ēnei kupu, e tohu ana i te ngaromanga anō hoki o ētahi mātauranga Māori .
Te kore e āhei ki te tae atu, ki te tirotiro hoki e pēhea ana ngā wāhi mahi matamata
Kua rongo ngā tāngata i te taha tonga o Waikato i te ngau o ngā kaupapa-here a te Kaunihera ā-Rohe ki tō rātou āhei ki te hao matamata i ngā wāhi kua hao ō rātou whānau i reira, mai rā anō. I tētahi tatauranga o te 2011–2012, ka kitea he maha rawa ngā wharau me ngā whare (ngā mea ka rēhitatia ki te Kaunihera) e hangaia ana ki te taha tonu o te awa . Ka mutu, e totoro ana ki ngā wāhi me ngā tāhuna kua roa e whakamahia ana hei pae hao matamata. Āpiti atu ki tēnei, arā ētahi whānau kua neke ki wāhi kē noho ai, kua kore e āhei ki te hoki ake ki te taunaha, ki te tiaki i ngā wāhi nei i te kaupeka mahi matamata. Kua tuhia ēnei pānga, ā, e āwhina ana ngā kōrero nei i ngā mahi aroturuki, engari he maha tonu ngā mahi kāore anō kia mahia.
He whiro e kaha ana te tupu, e tāmi ana i ngā rākau māori
I te korenga haeretanga o ngā pūnaha hauropi māori hauora, kua noho ko ētahi momo rākau rāwaho hei ‘kāinga rua’, hei whakamarumaru rua, hei pātaka rua mō ētahi momo māori. Koinei tētahi o ngā taukume o roto i ngā mahi whakaora repo. Hei tauira, he rākau urutā haere te whiro, engari he kāinga noho pai anō hoki mō te tuna.
Te rerekē haere o te pūnaha hauropi
I ēnei rā, ko ētahi o ngā tino tipu e pai ai te whakaputa uri a te matamata/inanga, ko ngā tipu e kīia ana he tipu kino, he tipu ka toro haere, ka urutā haere i ngā repo me ngā ngahere, pērā i te Yorkshire fog (Holcus lanatus), i te pātītī kikuyu (Cenchrus clandestinus) me te wandering jew (Tradescantia fluminensis). Ko tētahi mea āhua mīharo, ko te urutau pai o te matamata ki ēnei pātītī me ētahi atu tipu rāwaho e tipu ana i ngā awakeri me ngā takotoranga wai. Heoi anō, ko te mate kē, kei te whakararu ēnei tipu i ngā pūnaha hauropi māori. He nōhanga pai, he puna kai anō pea mō ētahi momo māori, engari kei te tāmoe i ngā tipu māori. Ko tētahi atu tauira o tēnei matawaenga, ko te whiro (ngāi Salix) – he rākau tēnei ka tāmoe i ngā rākau māori, engari he kāinga noho, he whakamarumaru pai mō te tuna (ngāi Anguilla), e ngākaurua ai te hunga whakaora repo.
He mea nui kia āta whiriwhiria te pānga o ngā tikanga hao matamata hou – tae atu ki te āhei o ngā kaihao ki te toro me te aroturuki i ngā wāhi hao tūroa, ngā rerekētanga i te pūnaha hauropi me te taiao – ki te nui o te matamata e mau ana i ēnei rā. Arā pea te rongoā , ko te āta whakaora ake i ngā taupori matamata.
He kōrero kōpūtahi
E tūhono ana tēnei korero ki Matamata – Ngā karu o Matariki me Me pēhea te whakaora ake i te matamata?
He whakamihi
I pūtakea mai tēnei mātaitanga i tētahi kōrero i titoa e Rangi Mahuta (Waikato) rātou ko Cheri van Schravendijk-Goodman (Te Āti Haunui-a-Pāpārangi, Ngāti Apa, Ngāti Rangi), ko Cindy Baker (Taihoro Nukurangi) mō te pukapuka Te Reo o Te Repo – The Voice of the Wetland.
He mea kawe tēnei mātaitanga ki Te Pūaha o Waikato, engari he t pai hei whakaatu me pēhea te tūhura me te whakaora ake i ētahi atu wāhi hao matamata.
Tuihonoa Te Reo o Te Repo.
E tika ana kia mihia ngā ētita me ngā kaituhi o Te Reo o Te Repo – The Voice of the Wetland mō rātou i whakaae mai, i tautoko mai i te hurihanga o te pukapuka nei. Me mihi hoki ngā pūkenga o Pauline Waiti rāua ko Hēni Jacob, tae atu ki ngā kaitautoko taha pūtea, ki a Manaaki Whenua me te kaupapa Unlocking Curious Minds a te MBIE.
