Te mahi tānga pua atua harore
I konei ka oti i ngā ākonga he tānga o ngā pua atua o te harore . He mōkitokito ngā pua atua – e kore e kitea noatia e te karu. Engari kia mahia he tānga pua atua, ka āhua kite tonu ngā ākonga pēhea rā te āhua o ngā pua atua.
Ā, i tēnei mahi, ka āhei anō te ākonga te kōwhiri i tētahi pātai kei tōna hinengaro mō te mahi tānga pua atua, me te hoahoa i tētahi tūhuratanga e whakautua ai taua pātai.
Te tānga pua atua o te harore Portobello
Te mahi tānga pua atua, mā te whakatakoto i te harore kia anga whakararo ngā pihapiha ki te pepa. Ka taupokina ki te oko, ka waiho kia pērā mō te pō. Me he harore e tika ana tōna pakari, ka tukua ōna pua atua, ka noho hei tānga ki te pepa.
Hei te otinga o te mahi nei, te tikanga :
kua pai te whai a te ākonga i ngā tohutohu hei mahi tānga pua atua
kua whiriwhiri ia he aha i oti pai ai, i kore ai rānei e oti pai te tānga
kua mōhio ake ki te whakatakoto pātai e taea ana te whakautu ki tētahi tuhuratanga māmā
kua mōhio ake ki te hoahoa, ki te whakatutuki hoki i tētahi tūhuratanga māmā.
Ngā mea e hiahiatia ana:
he harore (kia kotahi te momo, kia maha rānei)
he pepa mā, he pepa pango
he māripi
ētahi ipu aihikirīmi, he oko āhua pērā rānei te hanga
he taputapu whakarahi ake i te āhua o tētahi mea (he arotahi ā-ringa, he karu whakarahi matihiko, he kāmera rānei).
Tīkina te kōnae Word (kei raro nei te hononga).
He whakamihi
I hua ake tēnei rauemi i tētahi aratohu pūtaiao mā ngā kaiako, ko Ngā Hekaheka o Aotearoate ingoa. I tuhia te aratohu nei e Tākuta Peter Buchanan, o Manaaki Whenua; Tākuta Georgina Stewart, o Te Kura , Te Whare Wānanga o AUT; me Hēni Jacob. He mea tuhi ngā rauemi nei i runga i te aro nui ki te titiro a te Māori ki ēnei āhuatanga.
Tēnei te mihi a te Pokapū Akoranga Pūtaiao ki a Manaaki Whenua me ngā kaituhi kua whakaae nei, kua āwhina nei anō hoki i te whakawhitinga o ngā kōrero nei hei rauemi ipurangi. E taea ana tētahi tauira whitihiko o te Aratohu mā te Pouako te tiki atu i Huia Publishers.
